La batalha de Tolon se debanèt dau 20 au 26 d'aost de 1944 durant la Segonda Guèrra Mondiala. Foguèt la consequéncia d'una ofensiva còntra la vila dei fòrças francesas liuras que venián de desbarcament en Provença. Opausèt 52 000 soudats francés, principalament eissits dei tropas colonialas, a 18 000 Alemands.
Sostenguts per de resistents, lei Francés capitèron d'enceuclar Tolon lo 21. Puei, ataquèron lei linhas de defensa de la vila que foguèron rompudas entre lo 23 e lo 24 maugrat una resisténcia acarnada de la garnison. Enfin, leis asalhidors eliminèron lei darriers ponchs de resisténcia avans de recebre la capitulacion alemanda. Lei Francés perdiguèron 2 700 òmes tuats ò bleçats còntra un milièr de mòrts e 17 000 presoniers per leis Alemands.